|
SEWE-EN-VEERTIG (2019)
Mosela Mosholi, ’n ou vriendin uit haar tronkdae, bel Sarah Fourie halfvier op ’n koue wintersoggend wakker. Sy moet nóú kom, Kaapstad toe. Datameester Mosi se rekenaars voorspel ’n vierde moord op ’n toeris binne die volgende paar dae en Sarah met haar kuberkrakerkennis moet kom help. Sarah kan nie nee sê nie. Sy ken Mosi al jare lank, en haar skuld is groot, so sy sleep haarself uit die bed, gryp ’n oornagsak, en bel vir Jaap. Want Jaap Reyneke gaan moet saam. Mosi is in die moeilikheid en Jaap se jare as polisieman is al raad wat sy het indien ’n moordenaar op vrye voet is. Dit is ’n onvoorspelbare, donker Kaapstad wat op Jaap en Sarah wag. ’n Stad waarin misdadigers die toutjies trek, waar hommeltuie bokant jou tred hou van goeie én minder goeie dade, en toeriste onbewus is van dit wat in Clifton en Kampsbaai broei. |
|
SONDAG (2018)
Oukersaand. Drie mense verdwyn spoorloos. Kaptein AJ Williams ondersoek ’n inbraak by die Stables Estate in Pretoria-Oos. Die bekende sakeman Lafras van Zyl word vir dood agtergelaat en die res van sy gesin word vermis: sy vrou, Katerien, vryduiker met ’n Amerikaanse paspoort, en ook hul kinders, Willem en Cath. Ses weke later en daar is nog geen teken van hulle nie. Joernalis Alex Derksen en fotograaf Ranna Abramson is op die spoor van sewentienjarige Martina Buitendag van Stilfontein. Sy het in Johannesburg vermis geraak en al wat agtergebly het, is ’n verslete tas met R20 000 kontant en ’n handvol foto’s. Die stad van goud kan ’n gevaarlike plek wees. Twee misdade, baie geheime, en meer vrae as antwoorde. |
|
SIRKUS (2017)
“Ek wou kom totsiens sê.” Hy leun af tot hy my in die oë kyk. “Jy kon soveel beter gedoen het, weet jy dit? Maar nou sal jy doodgaan nes jy geleef het, ’n armgat meisie uit armgat Johannesburg. Pragtige lyf, gretig om te leer, maar dom, dom, dom.” Dis die laat tagtigs in Johannesburg. Adriana van der Hoon is agtien jaar oud. Haar aktivis-pa het jare lank oorsee geld vir die Education Trust ingesamel maar op ’n dag verander alles, en nou staan die veiligheidspolisie op haar drumpel met ’n ultimatum. As sy hulle nie help om die ANC se geldspoor van Duitsland na Suid-Afrika te volg nie, sit sy en haar chroniese siek ma sonder heenkome. En sy sonder haar studiebeurs. Dis hoe Adriana in Berlyn beland. Dis hier waar sy haar talent om messe te gooi vervolmaak, en waar sy Yasen Todorov ontmoet. Ver weg van alles wat bekend en veilig is, leer Adriana waartoe sy in staat is. Bowenal leer sy dat niemand, ook nie sý nie, ooit heeltemal onskuldig is nie. |
“Skarlaken bewys net weer: Irma Venter is wêreldklas.”
|
SKARLAKEN (2015)
Haar pa het buite gaan asemskep toe hy haar gesien het. Die boonste laag van die pan was gevries na die vorige nag. Dit het onder sy voete gekraak en fyn spinnerakke gemaak soos hy geloop het. Versigtig al nader aan die rooi fiets en die vrou wat op haar sy, halflyf - presies halflyf - in die modderige ys vasgevang was. Die fiets was nie hare nie, maar die trourok wel. Afgetrede polisieman Jaap Reyneke vra Sarah Fourie, 'n rekenaargenie met 'n kriminele rekord, om die raaisel rondom die dood van sy peetdogter, Janien Steyn, op te los. Janien was op die oog af geliefd, 'n suksesvolle kunstenaar met 'n slag vir besigheid, en op die punt om met haar universiteitsliefde te trou. Was dit selfdood of moord? Waarom is die toneel om haar liggaam so sorgvuldig, amper kunstig, gerangskik? En hoekom is haar rekenaar se geheue voor die tyd so deeglik skoongevee? Koop die boek by Exclusive Books, Graffiti Boeke en takealot.com. Koop die e-boek by amazon.com of kobobooks.com |
|
SONDEBOK (2014)
Adriana vra Ranna en Alex om onder die dekmantel van joernalistiek die storie van ’n jong vrou onder haar beskerming te ondersoek. Dit bring hulle op die spoor van ’n ou misdaad – die verdwyning van ’n talentvolle jong kunstenaar wat in haar matriekjaar spoorloos verdwyn het. Koop die boek by Exclusive Books en takealot.com. Koop die e-boek by amazon.com of kobobooks.com |
|
SKRAPNEL (2013)
Joernalis Alex Derksen verdwyn terwyl hy ‘n storie oor ’n mynsindikaat dek. Sy hacker-vriendin, Sarah, spoor Ranna Abramson in Indië op. Volgens Sarah is Ranna, Alex se groot liefde, die enigste een wat Alex kan help. Maar hoe hou die dood van Ranna se pa jare gelede verband met Alex se verdwyning? Iewers in Ranna se herinneringe lê die leidraad om ’n lank vergete misdaad op te los, maar sal sy dit herken as sy nie eens weet waarna sy soek nie? Koop die boek by Exclusive Books en takealot.com. Koop die e-boek by amazon.com of kobobooks.com |
|
SKOENLAPPER (2012)
Alex het ’n teorie oor chaos. Waar hy ookal gaan, volg dit hom. Dis hoekom hy joernalis geword het en hom nou in Tanzanië bevind. By ’n troue iewers tussen Dar es Salaam en Arusha ontmoet Alex vir Ranna, ’n vryskutfotograaf met ’n bos swart krulhare, ’n t-hemp wat sê Dr. Seuss is altyd reg, en ’n verlede waaroor sy nie praat nie. Alex wat lankal nie meer in Die Liefde glo nie, weet: dit is hoe dit voel. Maar dan haal die chaos hom in. Eers begin dit onophoudelik reën en paaie en dorpies spoel weg. En dan, wanneer die lyk van ’n Amerikaanse IT-biljoenêr op ’n strand uitspoel, word dit duidelik dat Ranna met rede haar verlede probeer begrawe. Waarom anders stel die polisie skielik in haar belang? Koop die boek by Exclusive Books en takealot.com. Koop die e-boek by amazon.com of kobobooks.com Koop die luisterboek by Audible.com |
